නයිජිරියාවේදී පැහැරගත් ලාංකිකයා නිදහස් ..

නයිජිරියාවේදී සන්නද්ධ කණ්ඩායමක් පැහැරගත් ශ්‍රි ලාංකික සිවිල් ඉංජිනේරුවරයා නිදහස් කර තිබෙනවා.

ඒ, ඔහු සේවය කළ ඉදිකිරීම් සමාගම මගින් අදාළ කප්පම් මුදල ගෙවීමෙන් අනතුරුවයි.

---

ෂෙනාලි රත්නසේකර - පැහැර ගත් පුද්ගලයාගේ දියණිය-         ගොඩක් ආසාවෙන් මම තාත්තිගේ  Voice එක ඇහුවේ. දවස් 5කින් විතර ආපුවහම පොඩ්ඩක් දුකක් හිතුවා. මොකද එයා ගොඩක් දුක් විඳින්න ඇති වෙච්ච දේත් එක්ක.

ඇය සිය මුවගට සතුටු සිනහවක් අද මෙලෙස එක්කර ගත්තේ  නයිජීරියාවේ දී සන්නද්ධ කණ්ඩායමක් පැහැර ගත් සිය පියා නිදහස් වූ බව දැනගත් පසුයි.

වේයන්ගොඩ - මොට්ටුන්න ප්‍රදේශයේ පදිංචි 68 හැවිරිදි, වෘත්තියෙන් ඉංජිනේරුවරයෙකු වූ ඩී.ඒ. කරුණාදාස මහතා පසුගිය 18 වැනිදා පැහැර ගැනීමට ලක්වූයේ නයිජිරියාවේ, ඔන්ඩෝ සහ කෝගී ප්‍රාන්ත මායිමේදි.

READ MORE : නයිජිරියාවේදී ශ්‍රි ලාංකිකයෙකු පැහැරගැනේ: නිදහස්ට කෝටි 50 ක කප්පමක් ඉල්ලයි 

දින 9ක් කප්පම්කරුවන්ගේ ග්‍රහණයේ සිටි කරුණාදාස මහතා  කප්පම් මුදල ගෙවා ඊයේ නිදහස් කර ගෙන ඇත්තේ ඔහු කළමනාකාරවරයෙකු ලෙස සේවය කරන බොරිනි ප්‍රොනෝ නැමැති ඉතාලි ඉදිකිරීම් සමාගම මගින්.

කෙසේවෙතත්, එම මුදල රහසක් බව කරුණාදාස මහතාගේ බිරිඳ සදහන් කළා.

 කරුණාදාසගේ බිරිඳ
-         ඒක අපිට කිව්වේ නැහැ. ඒක යන්නේ කම්පැණියයි, ඩිරෙක්ටයි අතර විතරයි. ඒක අපේ මහත්තයාවත් දන්නේ නැහැ.

කරුණාදාස මහතා නිදහස් කර ගැනීම වෙනුවෙන් නයිජීරියාවේ ශ්‍රී ලංකා තානාපති කාර්යාලය ද මැදිහත් වුණා.

වසර 37කට ආසන්න කාලයක් නයිජීරියාවේ සේවය කරන ඩි.ඒ. කරුණාදාස මහතාගේ එකම දියණිය ඔහු යළි ශ්‍රී ලංකාවට පැමිණෙන තුරු මඟ බලා සිටින්නේ නොඉවසිල්ලෙන්. 

 ෂෙනාලි රත්නසේකර - පැහැර ගත් පුද්ගලයාගේ දියණිය-         කොහොමත් එයාගේ අදහස තියෙන්නේ එහේ ඉන්න නෙවෙයි මෙහෙට එන්න. ඉතින් කවදා එයිද කියලා අපි ටතාම පිළිතුරක් නැහැ. එයා එනකං තමයි අපි බලන් ඉන්නේ.