ශිරන්ති රාජපක්ෂගෙන් ප්‍රශ්න කිරීම කතානායක නිල නිවසේදී

හිටපු ජනාධිපති මහින්ද රාජපක්ෂ මහතාගේ බිරිඳවන ශිරන්ති රාජපක්ෂ මහත්මියගෙන් පොලිස් මූල්‍ය වංචා විමර්ශන කොට්ඨාසය අද ප්‍රකාශයක් ලබාගත්තා.

ඒ, හිටපු ජනාධිපති බිරිඳගේ ප්‍රධානත්වයෙන් ක්‍රියාත්මක වූ සිරිලිය සවිය රාජ්‍ය නොවන සංවිධානයේ බැංකු ගිණුම්වල සිදු වූ බව පැවසෙන අක්‍රමිකතා සම්බන්ධවයි.

---

 හිටපු ජනාධිපතිවරයාගේ බිරිඳ, ශිරන්ති රාජපක්ෂ මහත්මියගේ අදහසකට අනුව ආරම්භ වූ සිරිලිය සවිය රාජ්‍ය නොවන සංවිධානය සිය මූල්‍ය ගනුදෙනු සිදු කළේ මහජන බැංකුවේ සුදුවැල්ල ශාඛාවේ විවෘත කළ ගිණුමක් හරහායි.

එම ගිණුමේ සිදු වූ අක්‍රමිකතාවයක් සම්බන්ධයෙන් පොලිස් මූල්‍ය වංචා විමර්ශන කොට්ඨාසය පරීක්ෂණ ආරම්භ කළ අතර එහි එක් අදියරයක් ලෙස අද ශිරන්ති රාජපක්ෂ මහත්මිය එම කොට්ඨාසය වෙත කැඳවනු ලැබුවා.

ඒ අනුව රාජපක්ෂ මහත්මිය අද පෙරවරුවේ ඒ සදහා පොලිස් මූල්‍ය අපරාධ කොට්ඨාසය වෙත පැමිණීමට පිටත් වුණේ මේ ආකාරයෙන්.

ඇයගේ පැමිණීම බලාපොරොත්තුවෙන් මාධ්‍යවේදීන් පෙරවරුවේ සිටම එම ස්ථානයේ රැදී සිටියත් රාජපක්ෂ මහත්මිය එම ස්ථානයට පැමිණියේ නැහැ.

ඒ වෙනුවට රාජපක්ෂ මහත්මිය කතානායක නිල නිවසේදී අදාළ ප්‍රකාශය ලබා දුන් බව ඇගේ මාධ්‍ය සම්බන්ධීකරණ නිලධාරී අනෝමා වැලිවිට මහත්මිය සදහන් කළා.

-         පිරිසක් මූල්‍ය අපරාධ කොට්ඨාසය අවට කලහකාරී ලෙස හැසිරුණා.  එම නිසා රාජපක්ෂ මහත්මියගේ ආරක්ෂාව සලකමින් ඇගේ ප්‍රකාශය විශේෂ ස්ථානයකදී  ලබා ගත්තා.

-    ප්‍රශ්නය  - ඕනෑම කෙනෙකු මෙවැනි ඉල්ලීමක් සිදුකළ විටදී එලෙස වෙනත් ස්ථානයකදී ප්‍රකාශය ලබා දිය හැකිද?

-         මාධ්‍ය ප්‍රකාශක - එහෙම බැහැ විමර්ශන නිලධාරීන්ගේ අනුමැතිය මත තමයි එය සිදුකළ හැක්කේ.

සිරිලිය සවිය ගිණුමේ මුදල් ලබා ගැනීමේ බලය පවරා තිබුණේ දෙකේ ඉලක්කම් 9ක් ඇති ජාතික හැදුනුම්පතේ අංකයක් හිමි ටී. රාජපක්ෂ හා එකේ ඉලක්කම් නවයක් ඇති ජාතික හැඳුනුම්පත් අංකයක් හිමි ඒ.එම්.ජේ.ඒ. කුමාරි යන අයවළුන්ටයි. 

මේ සම්බන්ධයෙන්  ශිරාණි රාජපක්ෂ මහත්මියගේ මාධ්‍ය සම්බන්ධීකරණ නිලධාරීවරියගෙන් විමසූ අතර ඇය පැවසුවේ එය අදාළ බැංකුවේ වරදක් බවයි.

අනෝමා වැලිවිට - ශිරන්ති රාජපක්ෂගේ මාධ්‍ය සම්බන්ධීකරණ නිලධාරී-         ඒ ගොල්ලෝ ඇතුළත් කරපු දත්ත තමයි මේ තියෙන්නේ. ඕක ෆෝම් එක මට ෆිල් කරන්න බැහැනේ. ඒකේ මැනේජර් සහ එතන ඉන්න කට්ටිය තමයි ඒ දේවල් දන්නේ. අපි නෙමේ. අපිට තියෙන්නේ අපි ගිහිල්ලා අත්සන් කරන තැන් කිව්වාම අත්සන් කරනවා. ෆිල් කරන ඒවා කරන්නේ ඒ ආයතනය.

සිරිලිය සවිය ගිණුමේ මේ වන විට රුපියල් මිලියන 43.8 ක මුදලක් ඇති අතර, එම සංවිධානය අංක 111201 යටතේ රාජ්‍ය නොවන සංවිධානයක් වශයෙන් මෙරට ලියාපදිංචිකර තිබෙනවා.

එහි ලියාපදිංචි ලිපිනය කාල්ටන් බංගලාව, තංගල්ල වන අතර දුරකතන අංකය 011 47 33 200 ලෙස සදහන්.

මේ  එම දුරකතන අංකයට ඇමතුමක් දුන් විට ලැබුණු ප්‍රතිචාරයයි.

 ප්‍රශ්නය - ආයුබෝවන් මේ සිරිලිය සවිය ආයතනයද?

-         නැහැ මේ ජනාධිපති මන්දිරයයි.

මේ අතර, හිටපු ජනාධිපති මහින්ද රාජපක්ෂ මහතාගේ ලිපි ශීර්ෂය යටතේ මේ සම්බන්ධයෙන් අද පස්වරුවේ මාධ්‍ය නිවේදනයක් නිකුත් කෙරුණා.

උපුටා ගැනීම -

  සිරිලිය සවිය සංවිධානය දේශීය හා විදේශීය මූල්‍ය හා ද්‍රව්‍යමය පරිත්‍යාග මත කටයුතු කරයි. මෙහි කටයුතු සදහා රජයේ මුදල් හෝ දේපළ කිසිවක් භාවිතා වී නැති බවත්,  ශිරන්ති රාජපක්ෂ මහත්මිය මූල්‍ය අපරාධ කොට්ඨාශයට දැනුම් දී සිටියාය.

-         සිරිලිය සවිය බැංකු ගිණුම් අත්හිටුවීමේ හේතුවෙන් එම සංවිධානයේ මූල්‍ය ආධාර ලබමින් සිටි රෝගීන් තිදෙනෙකු මේ වනවිට මියගොස් තිබෙන බව ආරංචි වූ බව ද රාජපක්ෂ මැතිණිය මූල්‍ය අපරාධ කොට්ඨාශයට දැනුම් දී තිබුණි.

-         බැංකු ගිණුම ආරම්භ කරන අවස්ථාවේදී බැංකුවට ශිරන්ති රාජපක්ෂ මැතිණියගේ විදේශ ගමන් බලපත්‍රයේ පිටපතක් සපයනු ලැබූ අතර, සෙසු බලධාරීන් දෙදෙනා වන කේ.එච්.ඒ.එන්. ජීවනී කුමාරි මැතිණියත්, එස්.කේ.කේ. දිසානායක මැතිණියත් තම ජාතික හැඳුනුම්පත්වල පිටපත් බැංකුවට සපයා තිබුණි.

-         අදාළ පුද්ගලයින් තිදෙනාගේ නම් සහ ලිපිනයන් නිවැරදිව සදහන් වුණත්, බැංකුවේ පරිගණක පද්ධතියට ජාතික හැදුණුම්පත් අංක ඇතුළත් කිරීමේදී යම්කිසි අතපසුවීමක් සිදුවී ඇති බව පෙනේ. 

උපුටා ගැනීම අවසන්...