එක්සත් ජාතීන්ගේ මානව හිමිකම් පිළිබඳ මහ කොමසාරිස් සිය වාචික වාර්තාවේ පූර්ව පිටපතක් නිකුත් කරයි
මානව හිමිකම් උල්ලංගණය කළ බවට සැකකරන ආරක්ෂක හමුදාවල ඕනෑම අයෙකු සම්බන්ධයෙන් පවත්වන විමර්ශන සම්පූර්ණ කරන තෙක් වහාම ඔවුන්ගේ සේවය අත්හිටුවිය යු...
https://sandunarosha.blogspot.com/2016/06/blog-post.html
ඊට අමතරව එක්සත් ජාතීන්ගේ මානව හිමිකම් පිළිබඳ මහ කොමසාරිස් සෙයිද් අල් හුසේන් කුමරු ද ප්‍රකාශ කරන්නේ මෙම නිර්දේශයට අමතරව තවත් නිර්දේශ 39 ක් ක්‍රියාවට නැංවීමට තමන් ශ්‍රී ලංකාවට අනුබල දෙන බවයි.
මහ කොමසාරිස්වරයා මේ බව සදහන් කරන්නේ එක්සත් ජාතීන්ගේ මානව හිමිකම් කවුන්සිලයට හෙට ලබාදීමට නියමිත වාචික වාර්තාවේ පූර්ව පිටපතක් නිකුත් කරමින්.
එක්සත් ජාතීන්ගේ මානව හිමිකම් පිළිබඳ කවුන්සිලයේ 32 වන සැසිවාරය මේ වන විට ස්විස්ටර්ලන්තයේ ජිනීවා නුවරදී පැවැත්වෙනවා.
ඊට මහ කොමසාරිස් සෙයිද් අල් හුසේන් කුමරු විසින් ඉදිරිපත් කිරීමට නියමිත වාචික වාර්තාවේ කරුණු 38 කින් සමන්විත පූර්ව පිටපතක් ඊයේ රාත්‍රියේ නිකුත් වුණා.
එක්සත් ජාතීන්ගේ මානව හිමිකම් පිළිබඳ මහ කොමසාරිස් කාර්යාලය විසින් ශ්‍රී ලංකාව සම්බන්ධයෙන් සිදු කළ විමර්ශනයේ නිර්දේශ ක්‍රියාවට නංවන ලෙසට ශ්‍රී ලංකා රජයට අනුබල දීම එහි ප්‍රථම කරුණයි.
ඒ අනුව,
මානව හිමිකම් උල්ලංගණය කළහොත් ඔවුන්ට දඬුවම් දෙන බවට ආරක්ෂක හමුදාවල සියලු ශාඛාවන් වෙත රජය පැහැදිලි, ප්‍රසිද්ධ හා නිසැක උපදෙස් නිකුත් කිරීම,
මානව හිමිකම් උල්ලංඝණය කරන ඕනෑම ආරක්ෂක අංශ සාමාජිකයෙකුගේ විමර්ශන අවසන්වන තෙක් සේවය වහා අත්හිටුවීමට ක්‍රියාකිරීම.
ආරක්ෂක අංශ ප්‍රතිසංස්කරණය.
අභ්‍යන්තර ආරක්ෂක කටයුතුවල හමුදාවේ භූමිකාව අඩු කිරීම සඳහා සමස්ථ සැලැස්මක් සකස් කිරීම.
හමුදාව විසින් අත්පත් කර ගනු ලැබ තිබෙන පෞද්ගලික ඉඩම් ආපසු ලබාදිම,
සිවිල් කටයුතුවලට හමුදාව මැදිහත් වීම අවසන් කිරීමට ප්‍රමුඛත්වය දීම,
ත්‍රස්තවාදය වැළැක්විමේ හා මහජන ආරක්ෂක යන පනත් ජාත්‍යන්තර නීතිය සමග අනුකූලවන පරිදි යළි සකස් කිරීම.,
ශ්‍රී ලංකාව ක්‍රියාවට නැංවිය යුතු කරුණු අතරවනවා.
ඊට අමතරව දේශීය ස්වාධීන විමර්ශන යාන්ත්‍රණයක් සහිත හයිබ්‍රිඩ් විශේෂ අධිකරණයක් යුද අපරාධ හා මානව වර්ගයාට එරෙහි අපරාධ විභාග කිරිමේ වරම් ලත් ජාත්‍යන්තර විනිසුරුවරුන් ඇතුළු විමර්ශකයින් ඇතුළත්වන පරිදි ස්ථාපිත කිරීම තවත් නිර්දේශයක්.
නිම කර නොමැති බරපතල මානව හිමිකම් උල්ලංඝණය හා සම්බන්ධ නඩු මෙම විශේෂ අධිකරණය හරහා විභාග කිරීම මානව හිමිකම් කොමසාරිස්වරයා අනුබල දෙන නිර්දේශ අතරවනවා.
ඊට අමතරව ත්‍රස්තවාදය වැළැක්වීමේ පනත යටතේ රඳවා සිටින රැඳවුම්කරුවන්ගේ සියලු නඩු විමර්ශනය කිරීම හෝ ඔවුන් නිදහස් කිරීම කළ යුතු බවටද මානව හිමිකම් කොමසාරිස්වරයා ශ්‍රී ලංකා රජයට අනුබල දෙනවා.
මෙම නිර්දේශවලට අමතරව සිය පූර්ව වාර්තාව මගින් මහ කොමසාරිස්වරයා ප්‍රකාශ කරන්නේ ශ්‍රී ලංකාවේ යහපාලන ආණ්ඩුව පොරොන්දු වූ ආණ්ඩුක්‍රම ප්‍රතිසංස්කරණ, යුක්තිය පසිඳලීම සහ ආර්ථික ප්‍රතිසංස්කරණ මෙතෙක් මුළුමනින්ම සාක්ෂාත් කරගෙන නොමැති බවයි.
මෙම පූර්ව වාර්තාව අනුව යමින් එක්සත් ජාතීන්ගේ මානව හිමිකම් පිළිබඳ මහ කොමසාරිස් සෙයිද් අල් හුසේන් කුමරු ශ්‍රී ලංකාව පිළිබඳව වාචික වාර්තාව හෙට ඉදිරිපත් කිරීමට නියමිත අතර ඊට ප්‍රති පිළිතුරු සැපයීම සඳහා විදේශ කටයුතු අමාත්‍ය මංගල සමරවීර හා අධිකරණ අමාත්‍ය විජේදාස රාජපක්ෂ මහත්වරුන් ප්‍රමුඛ නියෝජිත පිරිසක් හෙට මානව හිමිකම් සැසියට සහභාගිවනවා.
