ඕස්ට්‍රේලියානු මුහුදේදී අතරමං වූ ශ්‍රී ලාංකිකයින් 153 දෙනාට සිදුවූයේ කුමක්ද?

ඕස්ට්‍රේලියානු මුහුදේදී ශ්‍රී ලාංකිකයින් 153 දෙනෙකු රැගත් බෝට්ටුවක් අතරමං වූ  බවට වාර්තා පළ වී අදට සතියක් ඉක්ම යනවා.

එම සරණාගතයන්ට සිදුවුයේ කුමක්ද? 

ලංකිකයින් 153 දෙනෙකු රැගත් බෝට්ටුවක් තමිල්නාඩුවේ පොන්ඩිචේරි ප්‍ර දේශයෙන් පිටත්ව ගොස් ඇත්තේ පසුගිය ජුනි මස මැද භාගයේදී.

නමුත්, මෙම බෝට්ටුව පිළිබද වාර්තා වන්නේ කිලෝමීටර් 3000 කට අධික දුරක් ගෙවා  ඕස්ට්‍රේලියාවේ ක්‍රිස්මස් දිවයිනට ආසන්නයට පැමිණි පසුවයි.

ඒ, එහි සිටින පුද්ගලයෙකු ලබාදුන් දුරකතන ඇමතුමක් සමගින්.

- අපි සරණාගතයින්. අපි ශ්‍රී ලංකාවෙන් ඇවිත් ඉන්දියාව් සිටියේ. දැන් අධික වර්ෂාපතනයක් තියෙනවා. අපිට උදව් කරන්න කවුරුත් නෑ. මුහුදත් රළුයි. මේක ළමයිනුත් ඉන්නවා. අපිට දකින්න පුළුවන් සමහර නැව්වල සංඥාවන්. නමුත් ඒවා ධීවර යාත්‍රා ද නාවික හමුදා යාත්‍රාද යන්න අපි දන්නේ නැහැ. - අතරමං වූ බෝට්ටුවේ  සිටින පුද්ගලයෙක්.(2014.06.28 ) - මුලාශ්‍රය   - ඒ.බී.සී. ප්‍රවෘත්ති  -  

නමුත්, බෝට්ටුවෙන් ලැබුණු මෙම දුරකතන සබදතා පසුගිය සෙනසුරාදා පෙරවරුවේ සිට බිද වැටුණා.

පසුව බී.බී.සී. සිංහල සේවය සමග එක් වූ ඕස්ට්‍රේලියාවේ දේශපාලන රැකවරණ පතන්නන් වෙනුවෙන් වූ මධ්‍යස්ථානයේ  පැමෙලා කර් මහත්මිය පළ කළේ මෙවන් අදහස්.

ඒ බෝට්ටුව අතරමග නතර කරලා දුරකතන අරගෙන කියලා අපි සැක කරනවා. නමුත් තවමත් අපිට ඒක තහවුරු වෙලා නෑ. නමුත් අද අපිට තහවුරු කරන්න පුළුවන් දෙමළ භාෂා පරිවර්තකයින් කිහිප දෙනෙක් ගුවන් මාර්ගයෙන් නැවකට ගෙනිහිල්ලා තියෙනවා. බෝට්ටුවේ ඉන්න අයගෙන් ඔවුන් තොරතුරු විමසනවා. ප්‍රශ්න 4 යි ඔවුන් අහන්නේ. බොහෝ විට  ඔවුන්ගේ ප්‍රශ්න කිරීම් ඉවරවෙලා ශ්‍රි ලංකා නාවික හමුදාවට භාරදේවී. -පැමෙලා කර්  - ඕස්ට්‍රේලියාවේ දේශපාලන රැකවරණ පතන්නන් වෙනුවෙන් වූ මධ්‍යස්ථානය. (2014.04.02 )

මෙම වාර්තා සමග ඕස්ට්‍රේලියානු සරණාගත ප්‍රතිපත්තිය, ලොව මානව හිමිකම් සංවිධානවල හා එරට විපක්ෂයේ ද විවේචනයට ලක්වුණා.

 කොහොමද එහෙම කරන්නේ? කොහොමද ඔවුන් යවන්නේ? පවුල් පිටින් දරුවන් එක්ක. නැවතත් ඔවුන්ව හිංසනයකට ලක්වූ තැනටම. රහසිගත ආකාරයෙන්. -    ක්‍රිස්ටීන් මිල්නේ -  නායක ,ඔස්ට්‍රේලියානු හරිත පක්ෂය                                      

නමුත්, මෙම සරණාගතයින්ට සිදුවූයේ කුමක්ද යන්න සම්බන්ධයෙන් ඕස්ට්‍රේලියානු සංක්‍රමණ කටුයුතු පිළිබද අමාත්‍ය ස්කෝට් මොරිසන් සේම ඕස්ට්‍රේලියානු අග්‍රාමාත්‍ය ටෝනි ඇබට් මහතා ද අනුගමනය කළේ නිහඩ ප්‍රතිපත්තියක්.

මට තේරෙන්නේ නෑ. ඇයි මේකට විශේෂ කැමැත්තක් දක්වන්නේ කියලා. නමුත් මගේ දැක්මට අනුව මහජනතාවගේ කැමැත්ත වෙන එකක්.  ඒක තමයි ජාතික කැමැත්ත. - ස්කොට් මොරිසන්  -  ඔස්ට්‍රේලියානු සංක්‍රමණික කටයුතු පිළිබද අමාත්‍ය

මේ රජය ක්‍රමෝපායික ලෙස සිදු කරන්නේ දේශ සීමා ආරක්ෂා කිරීමත්, බෝට්ටු පැමිණීමක් වැළැක්වීමත් සහතික කිරීමත්.- ටෝනි ඇබට් -  ඔස්ට්‍රේලියානු අග්‍රාමාත්‍ය

මේ හේතුවෙන් බොහෝ තහවුරු නොකළ මුලාශ්‍ර උපුටා දක්වමින් ඕස්ට්‍රේලියානු මාධ්‍ය වාර්තා කළේ අදාළ සරණාගතයින් ශ්‍රි ලංකා නාවික හමුදාවට භාරදී ඇති බවයි.

නමුත් අප අද පස්වරුවේදී කළ විමසීමකදී නාවික හමුදා ප්‍රකාශක කමාන්ඩර් කෝසල වර්ණකුලසුරිය මහතා ඒ බව ප්‍රතික්ෂේප කළා.

පවතින තත්ත්වය හමුවේ ජුනි මස ඕස්ට්‍රේලියාව බලා  පිටත් වූ සරණාගතයින් 153 දෙනාට සිදුවූයේ කුමක්ද තවමත් අභිරහසක්..                            

________________________________________________________________________________

පුවත්වල අන්තර්ගතය සහ මුලාශ්‍රය වෙනස් කිරිමකින් තොරව භාවිතා කිරිමට අවසර ඇත.

© 2014 සඳුන් අරෝෂ ප්‍රනාන්දු - සියලු හිමිකම් ඇවරිණි

යෝජනා සහ අදහස් : අන්තර්ජාල කතෘ