ඌව මැතිවරණය සම්බන්ධයෙන් විපක්ෂය ගොනු කළ පෙත්සම නිශ්ප්‍රභයි..

ඌව පළාත් සභාවේ මන්ත්‍රීධුර සංයුතිය වෙනස් කිරීමට එරෙහිව එක්සත් ජාතික පක්ෂය ඉදිරිපත් කළ පෙත්සම ශ්‍රේෂ්ඨාධිකරණය අද ප්‍රතික්ෂේප කළා.

අගවිනිසුරු මොහාන් පීරිස් මහතා ප්‍රමුඛ ත්‍රිපුද්ගල විනිසුරු මඩුල්ල තීරණය කළේ, මන්ත්‍රී ධූර සංඛ්‍යාව සම්බන්ධයෙන් තිරණ ගැනිමට මැතිවරණ කොමසාරිස්වරයාට බලය ඇති බවයි.

---

විපක්ෂය විසින් මෙම පෙත්සම ගොනු කළේ, 21 ක් වු  බදුල්ල දිස්ත්‍රීක්කයේ  මන්ත්‍රී ධූර සංඛ්‍යාවෙන් 3ක් ඉවත් කර  එය මොණරාගලට එක්කිරිමට මැතිවරණ කොමසාරිස්වරයා ගත් තිරණය අභියෝගයට ලක් කරමින්.

ඊට විසඳුමක් ලැබෙන තුරු ඌව පළාත් සභා මැතිවරණය සඳහා නාම යෝජනා කැඳවීම තහනම් කිරීමේ නියෝගයක් නිකුත් කරන මෙන් ද  එක්සත් ජාතික පක්ෂය වෙනුවෙන්  පෙත්සම ඉදිරිපත් කළ , බදුල්ල දිස්ත්‍රික් හිටපු පාර්ලිමේන්තු මන්ත්‍රී හරීන් ප්‍රනාන්දු මහතා ඉල්ලා තිබුණා.

එය අද අගවිනිසුරු මොහාන් පිරිස් මහතා ප්‍රමුඛ ත්‍රී-පුද්ගල විනිසුරු මඬුල්ලක් ඉදිරියේ කැඳවූ අවස්ථාවේ දී වගඋත්තරකාර පාර්ශවය කරුණු ඉදිරිපත් කළා.

මැතිවරණ කොමසාරිස් වෙනුවෙන් පෙනී සිටි නීතිපති දෙපාර්තමේන්තුවේ නිලධාරීන් විසින් පෙන්වා දුන්නේ මැතිවරණ කොමසාරිස්වරයා විසින් තීරණය කරන ලද එම සංඛ්‍යාව 1988 අංක 02 දරන පළාත් සභා පනතේ 03 වන වගන්තිය යටතේ හා 2004 අංක 05 පළාත් සභා සංශෝධිත පනතින් සංශෝධිත පළාත් සභා පනතේ 3/3 උප වගන්තිය යටතේ නිවැරදිව තීරණය කළ බවයි. -    එම්.එම්. මොහොමඩ් - නියෝජ්‍ය මැතිවරණ කොමසාරිස්

ඒ අනුව ශ්‍රේෂ්ඨාධිකරණය පෙත්සම විභාගයට නොගෙනම නිශ්ප්‍රභ කිරීමට  තීරණය කළා.

අනතුරුව මාධ්‍ය වෙත අදහස් දක්වමින් පෙත්සම්කාර පාර්ශ්වය සදහන් කළේ 40,000 කට එක් මන්ත්‍රිධුරයක් ලබාදිය යුතුය යන මුල් පනතේ වගන්තිය ශ්‍රේෂ්ඨාධිකරණය පිළි නොගත් බවයි.  

 40,000 කට එකක් කියන එක වෙනස් කරන්න බෑ. ඒක පනතේ අනිවාර්යයෙන් ම තියෙන එකක්. දැන් බලන්න තිබුණේ 40,000 ට තීරණය කරලා ඉතුරුවක් තියෙනවාද කියලා. ඒක තමයි ඇත්තටම අදහස් කරන්නේ. ඉතුරුවක් තියෙනවානම් තවද කියන එක උඩ ඉඩම්වලට යම්කිසි ප්‍රමාණයක් බෙදන්න පුළුවන් ද කියලා. නමුත්, ඒ තර්කය උසාවිය පිළිගත්තේ නෑ. උසාවි තීන්දුව දැන් අවසන්. අපි ඒක පිළි අරගෙන ජයග්‍රහණය කිරීමේ මාර්ගයේ ඉදිරියටම යනවා. -        ජෝසෆ් මයිකල් පෙරේරා - උප නායක,එක්සත් ජාතික පක්ෂය