නීතිඥ උපුල් ජයසුරිය නඩුව:පාතාල කල්ලි නායකයින්ට ආරක්ෂාව, නීතිඥයින් 14,000 ක් නියෝජනය කරන සභාපතිවරයාට ආරක්ෂාව නැහැ

ශ්‍රී ලංකා නීතීඥ සංගමයේ සභාපති උපුල් ජයසුරිය මහතාට ආරක්ෂාව සැපයීමට අවසර ලබා ගැනීම සදහා නීතිය හා සාමය පිළිබද අමාත්‍යාංශයේ ලේකම්වරයා ශ්‍රි ලංකාවට පැමිණෙන තුරු සිටින බව පොලිසිය අද අධිකරණයට දැනුම් දුන්නා.

ඒ, තමන්ට මරණීය තර්ජන ඇති බවට නීතිඥ උපුල් ජයසුරිය මහතා ගොනු කළ පැමිණිල්ලක් කොළඹ මහේස්ත්‍රාත් අධිකරණයේදී අද යළි කැදවූ අවස්ථාවේදී.

---

කොළඹ ප්‍රධාන මහේස්ත්‍රාත් ගිහාන් පිලපිටිය මහතා ඉදිරියේ කැදවූ නඩුවට උපුල් ජයසුරිය මහතා වෙනුවෙන් ජ්‍යෙෂ්ඨ නීතිඥයින් රැසක් පෙනී සිටියා.

අධිකරණයට ලිඛිත වාර්තාවක් ලබාදුන් කොළඹ මධ්‍යම භාර ජ්‍යෙෂ්ඨ පොලිස් අධිකාරී පාලිත සිරිවර්ධන මහතා ප්‍රකාශ කළේ උපුල් ජයසුරිය මහතාට සුදුසු ආරක්ෂාවක් සපයා ඇති බවයි.

ජයසූරිය මහතාගේ නිවසට පොලිස් මුර සංචාර 18ක් සහ කාර්යාලයට පෙරේදා සිට ආරක්ෂාව ලබාදීමට පියවර ගත් බව පොලිස් අධිකාරීවරයා මෙහිදී සදහන් කළා.

පොලිස් නිලධාරීන් දෙදෙනෙකු බැහැ 

පොලිස් අධිකාරීවරයා සදහන් කළේ, ජයසූරිය මහතාට පොලිස් නිලධාරීන් දෙදෙනෙකු සහිත පුද්ගලික ආරක්ෂාවක් ලබාදීමට තමන්ට නොහැකි බවයි.

ඒ හේතුවෙන්, ජීවිත අවදානම් විශ්ලේෂණ වාර්තාවක් නීතිය හා සාමය පිළිබද අමාත්‍යාංශයට යොමු කර ඇති බව පොලිස් අධිකාරීවරයා අධිකරණයට ප්‍රකාශ කළා.

නීතිය හා සාමය පිළිබද අමාත්‍යාංශයේ ලේකම් නන්ද මල්ලවාරච්චි මහතා අධිකරණයට ලිඛිතව දැනුම් දී තිබුණේ, තමන් විදේශ ගතව සිටින බැවින්, නීතිඥ සංගම් සභාපතිවරයාට පොලිස් නිලධාරීන් දෙදෙනෙකුගේ ආරක්ෂාව ලබාදීමට සතියක් අවශ්‍ය බවයි.

පාතාල කල්ලි නායකයින්ට ආරක්ෂාව

ඊට දැඩි විරෝධයක් පළ කළ නීතිඥවරුන් ප්‍රකාශ කළේ පාතාල කල්ලි නායකයින්ට ආරක්ෂාව ලබාදෙන පොලිසියට නීතිඥයින් 14,000 ක් නියෝජනය කරන සභාපතිවරයාට ආරක්ෂාව සැලසීමට නොහැකි බවයි.

මෙහිදී නීතිඥ උපුල් ජයසුරිය මහතාගේ නිවස අසල සැකකටයුතු ලෙස ගැවසුණු පුද්ගලයින්ගේ දෙදෙනෙකුගේ ඡායාරූපය ද විවෘත අධිකරණයට ඉදිරිපත් කෙරුණා.

බලයෙන් පහ කෙරුණු අගවිනිසුරුවරිය සමඟ ශ්‍රී ලංකා නීතීඥ සංගමයේ සභාපති උපුල් ජයසුරිය 

ඒ සම්බන්ධ කනස්සල්ල පළ කළ මහේස්ත්‍රාත්වරයා පොලිසියට නියෝග කළේ ඔවුන් කවුදැයි මීළග නඩු දිනයේදී ප්‍රකාශ කරන ලෙසයි.

උපුල් ජයසුරිය මහතාට ආරක්ෂාව සැපයීම සම්බන්ධයෙන් කරුණු දැක්වීමට බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති අනුර සේනානායක මහතාට ලබන සදුදා අධිකරණය හමුවේ පෙනී සිටින්නැයි මහේස්ත්‍රාත්වරයා යළි නියෝග කළා.

අමෙරිකානු තනාපති සමඟ

එතෙක් සභාපතිවරයාගේ ආරක්ෂාව පෞද්ගලිකවම  කොළඹ මධ්‍යම භාර ජ්‍යෙෂ්ඨ පොලිස් අධිකාරී පාලිත සිරිවර්ධන මහතා වගබලා ගත යුතු බව මහේස්ත්‍රාත්වරයා මෙහිදී නියෝග කළා.

නඩු විභාගයෙන් අනතුරුව පැමිණිල්ලේ නීතිඥයින් මාධ්‍ය වෙත අදහස්  පළ කළා.                               

- දැන් රටේ අපරාධයක් වුනොත් ලේකම්තුමා එනකං ඉන්න ඕනද. මේක පුදුම තත්ත්වයක්-  ජනාධිපති නීතිඥ  ශ්‍රීනාත් පෙරේරා , උපුල් ජයසුරිය මහතා වෙනුවෙන් පෙනී සිටි නීතිඥ