පොලීසිය සම්බන්ධ ජනතා විශ්වාසය බිද වැටිලා - මානව හිමිකම් කොමිසම

"පොලීසිය සම්බන්ධ ජනතා විශ්වාසය  බිද වැටිලා "

පොලීසිය සම්බන්ධයෙන් ජනතා විශ්වාසය බිදවැටී ඇති බව ශ්‍රී ලංකා මානව හිමිකම් කොමිෂන් සභාව පවසනවා.
එහි නීති අංශයේ අතිරේක ලේකම් නීතීඥ නිමල් පුංචිහේවා මහතා ප්‍රකාශ කළේ පොලීසියේ ඇතැම් ක්‍රියාවන් විහිළු සහගත තත්ත්වයකට පත්ව ඇති බවයි.
අද පෙරවරුවේ කොළඹදී පැවති උත්සවයකට එක්වෙමින් ඔහු මේ බව සදහන් කළා. 

පිටපත -

ශ්‍රී ලංකා මානව හිමිකම් කොමිෂන් සභාවේදී අද පෙරවරුවේ මෙම උත්සවය පැවැත්වුණේ වද හිංසාවන්ට ලක්වූවන්ට සහාය පළ කිරීමේ ජාත්‍යන්තර දිනය වෙනුවෙන්.

ඊට යුද හමුදාව, පොලීසිය හා බන්ධනාගාර ආරක්ෂක අංශ නියෝජනය කරමින් නිලධාරීන් එක්ව සිටියා.

එහිදී ප්‍රධාන දේශනය සිදු කරමින් ශ්‍රී ලංකා මානව හිමිකම් කොමිෂන් සභාවේ නීති අංශයේ අතිරේක ලේකම් නීතීඥ නිමල් පුංචිහේවා මහතා සදහන් කළේ 2006 - 2013 කාලයේදී තම කොමිසමට ලැබුණු පැමිණිලි 5191 න් සියයට 86.7 ක් ම පොලීසියට විරුද්ධව ලැබී ඇති බවයි.

     අපි මහනුවර සම්මන්ත්‍රණයක් තිබ්බා. ඒකෙදී අපි කිව්වා ඔය පොලිසියේ ගෞරවයටත් හොද නැහැ. මේ සමහර ක්‍රියාකාරකම්. අපරාධ කාරයෙක් අල්ලගන්නවා මෙන්න මාංචු දාගෙන, ආයුධ සන්නද්ධව හය හත් දෙනෙක් යනවා. අනේ ගියාම මේ මනුස්සයා එකපාරටම ගන්නවා බෝම්බයක්. රිවෝල්වරයක්. දැන් ඉතින් ආත්මාරක්ෂාවට වෙඩි තියනවා. මේ වගේ විකට රංගනයන්නම් පොලිස් ගෞරවයට හොද නෑ කියලා. එතකොට එක ඒ.එස්.පී. මහත්තයෙක් කිව්වා. ඒක පිළිගන්නවා සර්. හැබැයි මිනිස්සු අපෙන් ඒක බලාපොරොත්තු වෙනවා. මිනිස්සු බලාපොරොත්තු වෙන දේද වෘත්තිකයින් ක්‍රියා කරන්න ඕන. මහජනයාගේ මේ අදහස නිසා පොලීසියත් ඒ අනුව ක්‍රියාකරනව. ඒක හරිද? ඒ නිසා වෘත්තිකයන් හැටියට අපි ක්‍රියාකරද්දී වෘත්තික භාවයෙන් ක්‍රියාකරන්න ඕන. මිනිස්සු හෝ දේශපාලන හෝ ආකෘති උඩ නෙමෙයි. 

-  නීතීඥ නිමල් පුංචිහේවා - අතිරේක ලේකම් (නීති)

ශ්‍රී ලංකා මානව හිමිකම් කොමිෂන් සභාව 

අනතුරුව සභාවට ප්‍රශ්න ඇසීමේ අවස්ථාව හිමි වුණා.

ප්‍රශ්නය - මෑත කාලීනව වාර්තාවනවා කුරුණෑගල පොලිස් නිලධාරියෙකුට වෙඩි තැබීමේ සිද්ධියේ ප්‍රධාන සැකකරු පොලිස් වෙඩි පහරින් මිය ගියා කියලා. මෙවැනි සිදුවීම් වෙන්න කලින් ඒවා වළක්වා ගැනීමට කිසියම් ආකාරයක ආකල්පමය වෙනසක් සිදුවිය යුතු නොවේ ද?පිළිතුර - යසන්ත කෝදාගොඩ - නියෝජ්‍ය සොලිස්ටර් ජනරාල්-         ඔය ඔබතුමියගේ ප්‍රශ්නයට පිළිතුරු සැපයිය යුත්තේ ශ්‍රී ලංකා පොලිස් දෙපාර්තමේන්තුවේ ජ්‍යෙෂ්ඨ නිලධාරියෙක්. ඇයි මෙහෙම දේවල් වෙන්න ඉඩ දෙන්නේ. මෙවැනි දෙයක් වුණාම ඇයි ඒ පිළිබදව බොරු කථා ප්‍රසිද්ධියේ ප්‍රකාශ කරන්නේ. ඇයි එවැනි දේවල්වලට වගකිව යුතු අයට එරෙහිව ස්වාධීන අපරාධ පරීක්ෂණ පවත්වා නීතිය ක්‍රියාත්මක කරන්න නොකරන්නේ කියන එක ගැනනම් මට පිළිතුරු දෙන්න බැහැ. ශ්‍රී ලංකා රාජ්‍ය තන්ත්‍රයේ අවුරුදු 25 හමාරක් නියෝජනය කරන පුද්ගලයෙක් වුණාට.

අනතුරුව අදාළ රැස්වීම නියෝජනය කළ නියෝජ්‍ය පොලිස්පති වරයෙකුට මීට පිළිතුරු සපයන ලෙස මුලසුන යෝජනා කර සිටියා.

මුලසුන - මෙතන සිටින නියෝජ්‍ය පොලිස්පතිවරයාට මේ ගැන කියන්න පුළුවන් වේවි.
නියෝජ්‍ය පොලිස්පතිවරයා  - ඒක කියන්න ඕන පොලිස් මාධ්‍ය ප්‍රකාශකවරයා.මුලසුන - මාධ්‍ය ප්‍රකාශකවරයා.... ඊළග වතාවේ අපි කැඳවමු... (සභාවේ සිනා) 

________________________________________________________________________________

පුවත්වල අන්තර්ගතය සහ මුලාශ්‍රය වෙනස් කිරිමකින් තොරව භාවිතා කිරිමට අවසර ඇත.

© 2014 සඳුන් අරෝෂ ප්‍රනාන්දු - සියලු හිමිකම් ඇවරිණි

යෝජනා සහ අදහස් : අන්තර්ජාල කතෘ